马后炮——衣家比你拣多次，你会选择越秀山定天体

高治 发表于 2013-9-28 22:30
我系米电视党唔需要向你解释，点样系对广州足球好？恒大噶财大气粗系长久之计？君不见恒大噶入主所带来噶 ...

如果越秀山可以改造嘅话，我都支持返越秀山。我94年开始睇太阳神，95年舅父带我入越秀山第一次现场睇波，期间经历过太阳神1998年喺省体场降级，我记得我个柜桶入边仲有当时派发嘅写住“我们后年甲A再见”嘅围巾；经历过2000年曾庆高喺省体场挽救广州职业足球；又经历之后改名为吉利、香雪、日之泉，同埋呢段时间广州足球喺中国二级联赛嘅沉沦。直到后尾广药入主，广州足球终于重新冲超成功，好激动，我当时仲系个0靓仔，虽然唔系喺助威区，不过我都会跟住又叫又跳，叫起“广州队”同埋“砌佢啦”，绝对唔会差。到咗后尾打假，广州被罚降级，跟住恒大入主，我自己开车同埋兄弟跟住球队去增城、去佛山。

对于越秀山，我可以明白佢对大家意味住咩，但系宜家嘅越秀山真系满足唔到更加多嘅广州球迷嘅热情。所以就宜家嘅现状嚟讲，我会拣天体。至于球迷睇热闹多呢啲情况，只可以讲系球迷联盟嘅功劳，唔好误会，我系真心赞你地，你地嘅热情吸引到好多人去现场同你地一齐叫一齐跳，无论佢地系想通过咁样嘅方式宣泄压力又好，佢地当系周末嘉年华都好，起码系第一步。
但系，有好多嘢就需要你地嘅会长不断咁用制度去完善嘞，唔好祸起萧墙，搞到自己后院起火，如果真系咁样，唔好话冇新球迷加入，连原有嘅人都会渐行渐远。
仲有一样嘢，我好想讲，如果返到越秀山，系，净系得球迷会嘅人入到场，可能主场气势会好好多。但系，你系咪又可以保证呢个赛季入到去嘅球迷就肯定会系搏晒老命助威而唔系翘手党？你又可以保证到冇入球迷会、入唔到场嘅唔系广州嘅死忠？
仲有啊，俾个建议啊，《广州队》呢首歌真系唔适合做队歌咧，高KEY到死，次次唱亲都要力竭声嘶，唔系个个人都系东山少爷啊，有时候助威声浪唔高，都唔可以怪球迷咖。纵观咁多个大球会，人地嘅队歌啲KEY都系比较平和、朗朗上口嘅，如果想声浪上个LEVEL，队歌应该谂谂佢，或者起KEY嘅人应该酌情降个KEY啊。